ગાંધીધામમાં જૂના બિલ્ડિંગનો સ્લેબ તૂટી પડ્યો, મોટો અકસ્માત ટળ્યો

ઉપશીર્ષક:
ઓસ્લો સર્કલ નજીક સત્યમ એપાર્ટમેન્ટમાં સવારના સમયે ઘટના – પાર્ક કરેલી કારને નુકસાન, જીવહાનિ ટળી
સમાચાર:
ગાંધીધામ શહેરના ઓસ્લો સર્કલ નજીક આવેલ સત્યમ એપાર્ટમેન્ટમાં આજે સવારના સમયે એક ગંભીર ઘટના બની હતી, જેમાં ચોથા માળેથી અંદાજે 7 થી 8 ફૂટનો સ્લેબ તૂટી નીચે પડ્યો હતો. આ ઘટના સવારે લગભગ 7:30 થી 8:00 વાગ્યાના સમય દરમિયાન બની હોવાનું જાણવા મળે છે.
સ્લેબ સીધો નીચે પાર્ક કરેલી કાર પર પડતા વાહનને ભારે નુકસાન થયું હતું. સદભાગ્યે, ઘટનાના સમયે ત્યાં કોઈ વ્યક્તિ હાજર ન હોવાથી મોટી જાનહાનિ ટળી હતી. સ્થાનિકોના જણાવ્યા મુજબ, જો આ સમયે કોઈ વ્યક્તિ અથવા સ્કૂલ જતો બાળક ત્યાંથી પસાર થતો, તો ગંભીર દુર્ઘટના સર્જાઈ શકતી હતી.
સુત્રો દ્વારા મળેલી માહિતી મુજબ, આ બિલ્ડિંગ લગભગ 30 વર્ષ જેટલું જૂનું હોવાનું સામે આવ્યું છે અને તેમાં રહેતા લોકો અગાઉ પણ બિલ્ડિંગની જર્જરિત હાલત અંગે ચિંતા વ્યક્ત કરી ચૂક્યા છે. તેમ છતાં, સંબંધિત તંત્ર દ્વારા પૂરતું ધ્યાન આપવામાં આવ્યું નહોતું એવી ચર્ચાઓ ચાલી રહી છે.
સ્થાનિક રહીશોનો આક્ષેપ છે કે આવા જોખમી અને જૂના બિલ્ડિંગો અંગે નગરપાલિકા સમયસર કાર્યવાહી કરતી નથી, જેના કારણે નાગરિકોના જીવને જોખમ ઉભું થાય છે. આ ઘટના પછી વિસ્તારમાં ભયનો માહોલ સર્જાયો છે.
પ્રભાવિત વ્યક્તિએ નગરપાલિકા કમિશનરને અપીલ કરી છે કે શહેરમાં આવેલા આવા જુના અને જોખમી બિલ્ડિંગોની તાત્કાલિક તપાસ કરી યોગ્ય પગલાં લેવાં જોઈએ, જેથી ભવિષ્યમાં આવી ઘટનાઓને અટકાવી શકાય.
ટાઈમ્સ ઓફ ઈન્કલાબ ન્યૂઝ
(સ્થાનિક જનતા માટે જાગૃતિ અભિયાન)